Ibas gozando no meu tormento

Ibas gozando no meu tormento,
    ibas fuxindo,
    por medo a min;
levouche a faldra curioso o vento…
    Vállame os ceos,
    ¡ai, o que eu vin!

Déndesde aquela, sempre sofrindo,
    o doce sono
    non conocín;
se durmo, en soños estou decindo:
    —Vállame os ceos,
    ¡ai, o que eu vin!

Espera un pouco, doce enemiga,
    se non ques que esto
salla de min;
se a todos, crúa, non ques que diga:
    —Vállame os ceos,
    ¡ai, o que eu vin!

Eduardo Pondal: Queixumes dos pinos (1886)

Versións:
Xocaloma: Ibas gozando no meu tormento; Soio un sono; 1979; Cara B, Corte 3