Lúa

A lúa é velliña
de brancos cabelos
de enrugas de ouro
e de olliños cegos.

Érguese do leito
das foulas do mar
palpando os espazos
para camiñar.

Anda polo mundo
sen ver a onde vai
pois as estreliñas
lévana na man.

Envolta en néboas
hase de abrigar
pois como vai vella
tense de coidar.

Cando na outra noite
brúa o temporal
a lúa entre as tebras
tápase a tremar.

E así que o mal tempo
amainado vai
asoma a faciana
¡espalla o luar!

Luis Amado Carballo: O galo (1928)

Versións:
Víctor Aneiros: Lúa; Heroe secreto; 2008; Pista 8