jueves, 17 de mayo de 2018

Galicia teima vida / Poema mundo Laxeiro

Pallas erbas xestas uces a ferver
follas framullas a podrecer e tódolos mortos a facer por vida

liña en teima teima vida
teima a vida-tobo-e-codia inceira cerrapecha
cerrapuchadiña cerrapuchadiña cerrapuchadiña
liña torta viravolta
primeira muiñeira que seguíu sempre i arrampla co mundo ó corro

sudar comer e beber / limparse ca mao
a cara quede toda polos ollos i a fala

camiños camiños non
carreiros a rubir e baixar e virar i escadar repetos
poxas
          nunca ó lonxe ollarollar

nenos que non van ó dito tirofeito
en todo se engaiolan e todo sanzan
cun pulo ou berro
guindastres do sangre a crebar o silencio
non seña máis longo que a verba
cinir embelecar e cair erguerse e ir e volverse estapinar teimar e teimar

as raigañas escacinan hastra atopar i atopan
a gran déidiva en pequeñas presas
nós a vaca i a ovella a xesta o toxal i o ucedo
carballo e castiñeiro millo e trigo
e todíñalas erbas bichiños e peixes fregándose as vidas

traballar traballar traballar traballar hastra cegar i enxordar

seica somos pra esto e señámolo pois
mais sin tender pontes en demasía longas
unha ponte ha chegar xusto dunha beira autra na que se reconoza a cara dun home

soñar
soñar tódalas cousas pra ter unha a unha
terra cativa e tanta
todo sucedéndose entr’a parva i a merenda
e abertas as noites cear todos xuntos e irse por parexas

agardar ós que volvan agardar outra hora agardar agardar
sin ningúa certeza e con seguranza
agardar outro século sécula seculorum repetindo os puntos da muiñeira hastra fundirnos

Uxío Novoneyra: Do Courel a Compostela (1988)

Versións:
Uxío Novoneyra: Galicia teima vida / Poema mundo Laxeiro; Do Courel a Compostela; 2010; Pista 1

No hay comentarios :

Publicar un comentario