Romeu

De Rosalinda a Julieta
média a distância de um suspiro.
Do, re em teclado de espineta;
um, dous em graus de leve giro.

E Julieta e Rosalinda
nom serám fases de umha lua?
Prata imóvel no céu, ainda
cando volúvel se insinua.

Rosa de pétalas fungíveis,
Júlia que Julho nom atinge.
A noite de lábios incríveis
mistura os nomes que vos finge.

Ricardo Carballo Calero: Cantigas de amigo e outros poemas (1980-1985) (1986)

Versións:

César Morán: Romeu; Musicando Carvalho Calero (VVAA)*; 2020; Pista 39



*[Concurso musical organizado pola AGAL (Associaçom Galega da Língua) en colaboración coa CRTVG e a Consellería de Cultura da Xunta de Galicia, para conmemorar o ano das Letras Galegas 2020, adicado a Ricardo Carballo Calero.]

Mas este coraçom aprende pouco

Mas este coraçom aprende pouco,
como nom seja a registrar loucuras;
nom a prevê-las e evitá-las. Duras
fidelidades de um notário louco.

A latejar calhado num salouco,
jazes caído em brêtemas escuras,
e vês da tua história as singraduras;
mas sem poder erguer-te do cabouco.

Um de ti espectador diáfanamente
espelha os trancos que te conduzirom
a cair nesta foja torpemente.

Outro reitera os dias que fugirom.
Entre cego caminhas e vidente.
Mas nada aprendes do que os olhos virom.

Ricardo Carballo Calero: Cantigas de amigo e outros poemas (1980-1985) (1986)

Versións:

Bitter Cans: Nada aprendes; Musicando Carvalho Calero* (VVAA); 2020; Pista 13



*[Concurso musical organizado pola AGAL (Associaçom Galega da Língua) en colaboración coa CRTVG e a Consellería de Cultura da Xunta de Galicia, para conmemorar o ano das Letras Galegas 2020, adicado a Ricardo Carballo Calero.]

Administrar o capital do nosso destino

Administrar o capital do nosso destino,
é umha forma de viver.
Querer trocar a moeda do nosso destino
é umha forma de morrer.
Aquilo é próprio de ti,
isto de min.
Vive, pois, Phoénix, a tua vida,
mentres eu morro a minha morte.
Hai um além que se chama autenticidade,
onde, se cadra, a tua vida e a miña morte
convergirám, como paralelas no infinito.

Ricardo Carballo Calero: Cantigas de amigo e outros poemas (1980-1985) (1986)

Versións:

Xan do Río: De cantigas de amigo e outros poemas; Musicando Carvalho Calero (VVAA)*; 2020; Pista 64

Alfredo González Vilela: Propio de ti, propio de min; Musicando Carvalho Calero (VVAA)*; 2020; Pista 66



*[Concurso musical organizado pola AGAL (Associaçom Galega da Língua) en colaboración coa CRTVG e a Consellería de Cultura da Xunta de Galicia, para conmemorar o ano das Letras Galegas 2020, adicado a Ricardo Carballo Calero.]

Ambulátorio

Somos velhos,
que os novos estám saos.

Somos pobres,
que os ricos vam alhur.

Falamos galego,
que é língua antiga e humilde.

Receitas, injecçons,
mediçons da pressom arterial.

Para outros mesteres
prefere-se a hospitalizaçom.

Todo à velocidade máxima.
É necessária a fluidez.

Hygeia, deusa,
voa com asas nos nozelhos.

Atender a muitos pacientes,
exige aforro de minutos.

É umha exigência técnica
da seguridade social.

Ricardo Carballo Calero: Cantigas de amigo e outros poemas (1980-1985) (1986)

Versións:

Maina Materia: Ambulátorio; Musicando Carvalho Calero* (VVAA); 2020; Pista 56



*[Concurso musical organizado pola AGAL (Associaçom Galega da Língua) en colaboración coa CRTVG e a Consellería de Cultura da Xunta de Galicia, para conmemorar o ano das Letras Galegas 2020, adicado a Ricardo Carballo Calero.]

Água e carbono é o teu corpo, sal

Água e carbono é o teu corpo, sal
precipitado en pousos na tua vida.
Comungo a tua forma corporal,
que a inextinguível sede me convida.

Na tua realidade está o ideal.
Caiu-che a roupa aos pés e estás despida.
Ignorante do bem como do mal.
Perdido Paraíso, Eva proibida.

Se à tua química orgânica me aferro,
mecânica do lume e do suspiro,
som aluno de física integral.

No cárcere sem luz do meu desterro,
No ar desenxabido que respiro,
água e carbono é o teu corpo, sal.

Ricardo Carballo Calero: Cantigas de amigo e outros poemas (1980-1985) (1986)

Versións:

Lagoa e Leni Pérez: Química orgánica; Musicando Carvalho Calero* (VVAA); 2020; Pista 55



*[Concurso musical organizado pola AGAL (Associaçom Galega da Língua) en colaboración coa CRTVG e a Consellería de Cultura da Xunta de Galicia, para conmemorar o ano das Letras Galegas 2020, adicado a Ricardo Carballo Calero.]

Se Avalon é a Ilha das Maçás

Se Avalon é a Ilha das Maçás,
eu quero ir a Avalon, e dormir esperando-te
todo o tempo preciso, para que me ofreças
algumha noite o fruto que me negas agora.
Recuperada a tua alma de fada,
hás-me tratar con magnanimidade,
e dormirás comigo sob a maceira
paradisíaca, sem medo à repressom
de invejosas potências ou ciumosos poderes.
Será um sonho gentil, sem mágoa, sem remorsos.
Um sonho como a vida, como a morte.
Por isso eu quero ir a Avalon, a Ilha
das Fadas e as Maçás.

Ricardo Carballo Calero: Cantigas de amigo e outros poemas (1980-1985) (1986)

Versións:

Manuel R. Crespo: Avalon; Musicando Carvalho Calero* (VVAA); 2020; Pista 15

Servando Barreiro**: Género e sexo não sempre vão da mão; Musicando Carvalho Calero* (VVAA); 2020; Pista 67



*[Concurso musical organizado pola AGAL (Associaçom Galega da Língua) en colaboración coa CRTVG e a Consellería de Cultura da Xunta de Galicia, para conmemorar o ano das Letras Galegas 2020, adicado a Ricardo Carballo Calero.]
**[O recitativo de Servando Barreiro está precedido pola musicalización do poema Calquer lugar é bom para morrer, da obra de Ricardo Carballo Calero: Cantigas de amigo e outros poemas, do ano 1986.]

Calquer lugar é bom para morrer

Calquer lugar é bom para morrer. Nom se distingue o home da mulher. A morte é neutra —das Tod— em alemám. Género e sexo nom sempre vam da mam.
Pois umha cousa é a anatomia e outra a gramática —falaz dicotomia. Nom vejo a morte feminista ser. Calquer lugar é bom para morrer.
Donas do tempo passado ou do actual, a morte a todas trata-vos igual que aos cavaleiros. Violenta, a história o di. Muitas mulheres morrerom assi. Em Rouen foi Joana d'Arco queimada; Antoinette em Paris guilhotinada; Em Chappaquiddick, Jo foi perecer. Calquer lugar é bom para morrer.
Eis umha flor para o lume e o mar, a praça, o paço ou calquer lugar onde a mulher tenha o seu passamento. Erga-se a rosa sobre o moimento. Nesta matéria nom é discriminada. Inês ferida, Mariana agarrotada, Mary Jo sulagada, Jeanne a arder. Calquer lugar é bom para morrer.

Ricardo Carballo Calero: Cantigas de amigo e outros poemas (1980-1985) (1986)

Versións:

Dandy Fever*: Calquer lugar é bom para morrer; Musicando Carvalho Calero** (VVAA); 2020; Pista 6

Benja Morana*: Calquer lugar é bom para morrer; Musicando Carvalho Calero** (VVAA); 2020; Pista 10

KDZ: Calquer lugar é bom para morrer; Musicando Carvalho Calero** (VVAA); 2020; Pista 26

Katerina Linke: Calquer lugar; Musicando Carvalho Calero** (VVAA); 2020; Pista 35

Os Kijoteros: Calquer lugar é bom para morrer; Musicando Carvalho Calero** (VVAA); 2020; Pista 38

Servando Barreiro: Género e sexo não sempre vão da mão***; Musicando Carvalho Calero** (VVAA); 2020; Pista 67

West Side Bones: Calquer lugar; Musicando Carvalho Calero** (VVAA); 2020; Pista 68



*[Finalista do concurso Musicando Carvalho Calero 2020.]
**[Concurso musical organizado pola AGAL (Associaçom Galega da Língua) en colaboración coa CRTVG e a Consellería de Cultura da Xunta de Galicia, para conmemorar o ano das Letras Galegas 2020, adicado a Ricardo Carballo Calero.]
***[A versión musical de Servando Barreiro está seguida do recitativo do poema Se Avalon é a Ilha das Maçás, da obra de Ricardo Carballo Calero: Cantigas de amigo e outros poemas, do ano 1986.]