Tres segundos de memoria bastarían para recordarte

IV

Tres segundos de memoria bastarían para recordarte.

O corazón é un ourive
que trafica coas cadeas do desexo
e condensa as lembranzas
coma a esencia dos perfumes.

Esculpe matrioskhas,
pequeñas caixas de Pandora
para gardarte nelas
        e non abrirte nunca,
para soterrar o medo a que devores
os meus labirintos internos.

Ti
e a nosa historia toda
concentrada en tres segundos.

Celia Parra: No berce das mareas (2009)

Versións:

A banda da loba: Tres segundos*; Bailando as rúas; 2017; Pista 1



*[A versión musical do grupo A banda da loba, repite, a xeito de retrouso, os títulos dos tres capítulos nos que se divide a obra de Celia Parra, No berce das mareas: 1. A memoria…; 2. …é un preludio…; 3. …do esquecemento.]