Plata fina

Barrendo coa basoiriña,
xogando a facer limpeza,
¡era a nena plata fina!

Lavándose a camisiña,
xogando a ser lavandeira,
¡era a nena plata fina!

Remendando a súa roupiña,
xogando a ser costureira,
¡era a nena plata fina!

Cociñando o seu xantar,
xogando a ser cociñeira,
¡era a nena plata fina!

Xogando coa súa boneca,
facendo de mamaciña,
era a nena pura plata
¡era a nena plata fina!

Dora Vázquez: Oriolos neneiros (1975)

Versións:

Suso Vaamonde: Plata fina; Rapazas, rapaces e rapazadas; 1997; CD1, Pista 6

Picariño

Picariño que ó moucho
non lle tés medo,
non enredes de noite
deitate cedo.

Non andes axexando
por entre as sombras,
que na rúa hai marmulos,
ditos e cousas…

E o sapo, as margaridas,
a iauga, a frouma,
son os longos pantasmas
que a noite póboan.

E contan os máis vellos
que a cotovía,
rolda por os toxales
até que é día.

Pura Vázquez: Oriolos neneiros (1975)

Versións:

Suso Vaamonde: Picariño; Rapazas, rapaces e rapazadas; 1997; CD1, Pista 2

Anduriñas veñen

Anduriñas veñen,
anduriñas van...

Fan os seus niñiños,
logo criarán.

Paxariños novos
pronto voarán
co seu chío chío,
co seu chío cha...

¡Déixate, meu neno,
déixate arrolar,
que as anduriñas
logo chegarán!

Faránche a... rru... rru...
faránche a... a... a...
¡Cancións por o vento
elas cantarán!

Anduriñas veñen,
anduriñas van...
¡Déixate, meu neno!
¡Déixate arrolar!

Dora Vázquez: Oriolos neneiros (1975)

Versións:

Suso Vaamonde: Anduriñas veñen; Rapazas, rapaces e rapazadas; 1997; CD2, Pista 5

A xogar, gueivotas

As gueivotas nadan
polo mar azul;
as gueivotas voan
por a area crara...

¡Lévame, gueivota
da prumiña branca!
¡Lévame na rolda
contigo nas áas!

Emborcallarémonos
os dous por a area,
faremos buracos
con auga salada...

¡Lévame, gueivota,
a da pruma branca!
¡Lévame, gueivota,
contigo pra praia!

Dora Vázquez: Oriolos neneiros (1975)

Versións:

Suso Vaamonde: A xogar gaivotas; Rapazas, rapaces e rapazadas; 1997; CD2, Pista 2

¡A rodiña... roda!

Volvoreta,… ¡voa!...
¡Voa, volvoreta!...
Volvoreta, ¡vente
conmigo pra serra!

Alí hai tomelo,
tamén herbaboa,
e alí xogaremos
¡á rodiña, roda!...

Verás aos pastores
gardar nas ovellas,
e ouvirás na ermida
cantar a novena.

Volvoreta;… ¡voa!...
¡Voa, volvoreta!...
Que o sol pola cume
xa doura na serra.

Frorece o tomelo,
tamén a herbaboa,
e alí xogaremos
¡á rodiña, roda!...

Dora Vázquez: Oriolos neneiros (1975)

Versións:

Suso Vaamonde: A rodiña roda; Rapazas, rapaces e rapazadas; 1997; CD2, Pista 7

O baile da Cenicenta

Bailái, paxariños,
dos ventos ao son,
que estrenóu a lúa
un grande farol.

Que garden as fadas
carrozas de sol,
porque a Cenicenta
ao baile chegóu…

A carroza era de ouro,
o vestido de fror,
e o seu cocheiriño
era un rato "rabón".

¡Chorái, paxariños,
dos ventos ao son!...
¡Pobre Cenicenta!
¡Sin zapato quedóu!

Gardóuno o seu principe
porque lle gustóu…
¡Bailái, paxariños!
¡Con ela casóu!

Dora Vázquez: Oriolos neneiros (1975)

Versións:

Suso Vaamonde: O baile da cenicenta; Rapazas, rapaces e rapazadas; 1997; CD2, Pista 9