Señor gato

Señor Gato:
atención;
no rincón
hai un burato;
no burato
está o rato
caladiño,
acochadiño,
sen falar
nin respirar.

—Señor Gato,
pon sentido
que metido
no burato
está o rato.

—Señor Gato:
está o rato
no burato
do rincón:
¡ten nun puño
o corazón!

—Eu non dudo,
Señor Gato
bigotudo
que está o rato
no burato.
Ten as unllas
afiadas,
cravuñadas,
preparadas:
bule axiña
que senón
Señor Gato
bigotón,
¡do burato
fuxe o rato!

Manuel María: Os soños na gaiola (1968)

Versións:

Na Virada: Sr. gato, atención; Rolada das cantigas; 2002; Pista 6

Uxía Senlle: Señor gato; Andando a terra. Uxía canta a Manuel María; 2013; Pista 8