Ando a pedirlle á vida

Ando a pedirlle á vida: luz, beleza,
delicadeza xentil, unha canción,
a virginal tempestade da paixón,
o dereito á diñidade e á entereiza.

Pídolle, amiga, que a frol do corazón
se peche sempre ao odio e a vileza
e que se abra ao amor, á sinxeleza,
ao latexar sinceiro da emoción.

Cando sinta chegar o meu remate
agardarei, sereamente, o propio fin
recebendo a lanzada que me mate.

Pois, co decorrer dos anos, aprendín
como podo vencer neste combate:
¡amando á vida e que ela me ame a mín!

Manuel María: As lúcidas lúas do outono (1988)

Versións:
Uxía Senlle: Unha canción; Andando a terra. Uxía canta a Manuel María; 2013; Pista 6