No novo ceo

Deica o mencer chegaron os seus berros,
—e hastra as estrelas se estremoreceron—
chapuzaduras inda do seu sangue
vello no novo ceo.

Á beira do ancho río
da miña vida nova,
matei aquel recordo
que ó corazón se me enroscaba vivo,
na noite horrible: tiven que afogalo
en bágoas. Pro os seus berros
chegaron deica o mesmo
mencer, ¡chapuzaduras do seu sangue
vello no novo ceo!

Xosé María Díaz Castro: Nimbos (1961)

Versións:

2naFronteira: No novo ceo; Zapatiños para Díaz Castro; 2014; Pista 5