Ten sede a avenza das nubes
e baixa a beber ao río;
pérdense algunhas ovellas
antre os carballos espidos.
A pastora lúa,
coas mans de luar,
acénalle ao vento
quen, ladrador can,
pola carballeira
vainas a buscar,
e aos eidos do ceo
vólveas a levar.
Ao sintirse magoadas
polas poutas das estrelas,
cara á banda de Santiago
todas dan sebo ás canelas.
A pastora lúa
incírralle o vento
ó fato e tras del
bótase correndo,
mais as ovelliñas
fúxenlle con medo,
e, polo horizonte,
pérdense tremendo.
Correndo o vento tras delas
foi bater contra uns penedos,
esnaquizou a cachola,
ficou ouveando e morrendo.
A lúa, branca pastora,
toda a noite anda a chorar;
polo vieiro de Santiago
fuxíronlle avenza e can;
ha de vir seu pai o sol,
tenlle medo ao seu rifar
e corre, enantes que veña
tras do monte a se agachar.
Florencio Manuel Delgado Gurriarán: Bebedeira (1934)
Versións:
Anxo Rei: Branca pastora; Fronteira de cegoñas; 2003; Pista 9
No hay comentarios :
Publicar un comentario