Xaneiro 1972, II

                                                  O pan é mais útil que a poesía,
                                                  pro ¿cómo comer o pan
                                                  sin o compango da poesía?
                                                                                          A.S.

Cando quero vivir
digo Moraima.
Digo Moraima
cando semento espranza.
Digo Moraima
e ponse azul a alba.

Cando quero soñar
digo Moraima.
Digo Moraima
cando a noite é pechada.
Digo Moraima
e ponse a luz en marcha.

Cando quero chorar
digo Moraima.
Digo Moraima
cando a anguria me abafa.
Digo Moraima
e ponse a mar en calma.

Cando quero surrir
digo Moraima.
Digo Moraima
cando a mañá é crara.
Digo Moraima
e ponse a tarde mansa.

Cando quero morrer
non digo nada.
E mátame o silencio
de non decir Moraima.

Celso Emilio Ferreiro: Onde o mundo se chama Celanova (1975)

Versións:

Suso Vaamonde: Moraima; Celso Emilio Ferreiro na voz de ...; 1980; Lado A, Corte 5

María Manuela e Miguel Varela: Moraima; Barco na alba; 1990; Cara A, Corte 5

María do Ceo: Moraima; No bico un cantar; 2010; Pista 8

Lucía Pérez e Sito Sedes: Moraima; Quince soles; 2018; Pista 7