Quechemarín da verde bandeira

Quechemarín da verde bandeira,
o mariñeiro u é?

Ondas amigas do mar levado,
o mariñeiro u é?

Norés que tés a aza lixeira,
o mariñeiro u é?

Ti sirea que cantas soñado,
o mariñeiro u é?

Limós no áer
navíos no mar,
prendas de amante
pra quén serán?

Ai!, xa sinto os remos madre no mar,
meu amigo novo non tornará!

Álvaro Cunqueiro: Dona do corpo delgado (1950)

Versións:

Amancio Prada: No bico do galo a i-alba / Quechemarín da verde bandeira*; A dama e o cabaleiro; 1987; Pista 9



*[A versión musical de Amancio Prada está composta por éste e máis polo poema No bico do galo a ialba, da obra Dona do corpo delgado, de Álvaro Cunqueiro.]

Derradeira elexía a Manoel Antonio

Diríamos que pedra para a tua fronte fría
—para a tua alma mar e vento duro.
Ti sí poeta, fenecido de algas verdes
o teu único corpo, silencioso e breve.

Agora escoita ehí, nese outro lado,
onde ás mareas e a Deus e á sombra toda
coma o Norés se repite, fondo estrano,
viaxeiro antergo, gueivota no teu sangue.

Nós non choramos. Finamente tristes
desconsolado ouvido inacabábel somos.

Álvaro Cunqueiro: Dona do corpo delgado (1950)

Versións:

César Morán: Derradeira elexía a Manoel Antonio; Haberá primavera; 2011; Pista 12

No bico do galo a ialba

No bico do galo a ialba
      alba e vayliero!
No bico do sono a ialba
      alba e vayliero!
Alba do corpo delgado,
      alba e vayliero!
de quen ando namorado,
      alba e vayliero!
Dormirei nesa fonte,
      alba e vayliero!
por ver chegar a ialba
      alba e vayliero!

Álvaro Cunqueiro: Dona do corpo delgado (1950)

Versións:

Amancio Prada: No bico do galo ai-alba / Quechemarín da verde bandeira*; A dama e o cabaleiro; 1987; Cara B, Corte 3

A Quenlla: No bico do galo; 30 anos con A Quenlla de amor, dor e loita; 2014; CD2, Pista 2



*[A versión musical de Amancio Prada está composta por éste e máis polo poema Quechemarín da verde bandeira, da obra Dona do corpo delgado, de Álvaro Cunqueiro.]

O cabaleiro da pruma na gorra

O cabaleiro da pruma na gorra,
meu amigo é!
O cabaleiro do verde tabardo,
meu amigo é!
Ogallá que na guerra non morra,
meu amigo é!
Non de frecha, de asta nin dardo,
meu amigo é!

Álvaro Cunqueiro: Dona do corpo delgado (1950)

Versións:
Amancio Prada*: A dama que ía no branco cabalo / O cabaleiro da pruma na gorra; A dama e o cabaleiro; 1987; Pista 1



Amancio Prada*: A dama e o cabaleiro; 3 poetas en el círculo; 1998; Pista 1



*[A versión musical está precedida polo poema A dama que ía no branco cabalo de Álvaro Cunqueiro]

A dama que ía no branco cabalo

A dama que ía no branco cabalo
levaba un pano de seda bordado
Na verde fror
as letras van de amor!

O cabaleiro do cabalo negro
levaba unha fita colléndolle o pelo
Na verde fror
as letras van de amor!

No meio do río cambiaron as vistas,
el para o pano i ela prá fita.
Na verde fror
as letras van de amor!

As vistas lles viron no río cambiar
e o pano e a fita por se namorar.
Na verde fror
as letras van de amor:
Con amor vivirás!

Álvaro Cunqueiro: Dona do corpo delgado (1950)

Versións:
Amancio Prada: A dama que ía no branco cabalo / O cabaleiro da pruma na gorra*; A dama e o cabaleiro; 1987; Pista 1



Amancio Prada: A dama e o cabaleiro*; 3 poetas en el círculo; 1998; Pista 1



*[A versión musical de Amancio Prada remata co poema O cabaleiro da pruma na gorra de Álvaro Cunqueiro]