Cencia do adro

      Sementar en leira alléa,
pagar sendo convidado,
comprar a rico e na aldéa,
vender a pobre e fiado…
non é prá ter casa chea.

      Muller que adoura á veciña,
rapaza que dorme fora,
pedra limpa da cociña
e meniño que non chora…
non che me dan boa espiña.

      Palique de taberneira
e bágoas de bebedor,
amores de costureira
e xastre traballador…
sonche contiños de feira.

      Crego que che queira mal,
alcalde no teu outeiro,
escribano no portal
e lume polo palleiro…
salvarás si Dios che val.

      Apostar o que se ten,
firmar o que non escribo,
donar sin saber a quén
e dar cartos sin recibo…
penso que no me convén.

      Estremeiro pleiteador,
néboas agoentas do río,
boi, ou vaca, escorneador,
e xente de xeñorío…
canto máis lonxe mellor.

      Si tes muller parideira
e pagas rendas a frades,
si entra o raposo na eira
e dás de xantar a abades…
non che envexo a capoeira.

Ramón Cabanillas: No desterro (1913)

Versións:
Fuxan os Ventos: Cencia do adro; Quen a soubera cantar; 1981; Lado 2, Crote 1