viernes, 25 de enero de 2019

Beber leite

Beber leite.
Veludo albar na epiderme lenísima dese túnel almado
entre o ar alleo e o cerne do corpo.

Un beixo longuísimo.
Aloumiño impausado gutural e branco
mesmo até deixalo asomar liquidísimamente ás
comisuras frescas da boca rosa.
Lene paz
               fluidamente suculenta.
Co pracer morno e a textura incrible
Donda paz exquisita
                                 de dimensión gorentosa.
Qué seda branca acougada bicando con suavidade
as paredes ávidas da gorxa.
Aínda que ás veces as
                                    présas ávidas da sede
me fagan apurala como menciña milagreira
          nesta enfermidade de fastío terminal.
Máis rápido. Máis rápido. O vaso enteiro.
Quéroa toda xa anegándome o
                                                 esófago.
Non importa xa o osíxeno as mesuras as
magnitudes frixidas
Apremiante gaiola imantada
Branco solaz sixiloso e espléndido
Cortinaxe de plumas lácteas
Diálogos de caricia licuada
Un beixo ininterrompido

É coma
             beber leite.

Yolanda Castaño: Elevar as pálpebras (1995)

Versións:
Yolanda Castaño*: Beber leite; Edénica; 2000; Pista 3



*[A versión musical de Yolanda Castaño foi composta, arranxada, grabada e producida por José Antonio Fernández Calero (Factoría musical SSM).]

No hay comentarios :

Publicar un comentario