o que acontece con Daniel:
os que o tiñan desterrado
agora falan ben del.
O palurdo de alma lerda
O tendeiro desertor,
O vinculeiro da merda
disfrazado de señor.
O lurdo carca refrito
o monifate de entroido
o aprendiz de señorito,
marqués de quero e non poido.
O badoco endomingado,
o franquista pousafol,
o forricas desleigado,
o pequeno burgués mol.
O devoto do onanismo,
o feligrés de pesebre,
o tolleito de cinismo,
o que dá gato por lebre.
O rateiro do peirao,
o refugallo incivil,
válense de Castelao
pra esconder a caste vil.
Escoita puto nefando,
criado na servidume
non pasará o contrabando
dise teu noxento estrume.
Grotesco escriba sandéu,
inxertado nun raposo.
Castelao nunca foi teu,
porque Castelao é noso.
I anque a ti che importa un pito,
sabrás que é cousa sabida,
que estás incurso en delito
de apropiación indebida.
Celso Emilio Ferreiro: Cantigas de Escarño e Maldecir (1975)
Versións:
Miro Casabella: Olla meu irmao; Miro canta cantigas de Escarnho e de Mal Dizer; 1969; Cara 2, Corte 1
Miro Casabella: Olla meu irmao; Galiza a José Afonso. Concerto ao vivo. Agosto de 1985 (VVAA)*; 1999; CD1, Pista 9
Luar na lubre: Olla meu irmau; Saudade; 2005; Pista 2*[Concerto celebrado no Parque de Castrelos de Vigo]
No hay comentarios :
Publicar un comentario