lunes, 18 de abril de 2016

Decides que o matrimonio

Decides que o matrimonio
é santo e bueno. Seráio;
mais non casóu San Antonio,
por máis que o mesmo demonio
tentóuno a facelo ensaio.

Celicios, cantos poder;
penitencias, a Dios dar;
mais santo n'houbo, a meu ver,
que dos casados quixer
ca pesada cruz a cargar.

Nin os santos padres todos,
de quen tes tantos escritos
e alabas de varios modos,
quixeron naqueses lodos
meter os seus pes benditos.

Do direito, do rivés,
matrimonio, un dogal es;
eres tentazón do inferno;
mais casaréi..., pois no inverno
¡non ter quen lle a un quente os pes...!

Rosalía de Castro: Follas Novas (1880)

Versións:
Dolores Plata: Decides que o matrimonio; Lúa descolorida; 1985; Cara B, Corte 4

No hay comentarios :

Publicar un comentario