O lume novo

Hoxe é lume novo,
noite de San Xohán.
¡As ledas fogueiras
acesas están…!

¡Que gusto, rapaces,
saltar as fogueiras,
dar brincos, rebrincos
e pinchacarneiras!

¡Que gusto, rapaces,
correr e saltar,
dar brincos e pulos,
volver a brincar!

¡Que gusto, que ben
saltar as fogueiras
cas chamas subindo,
medrando lixeiras!

Á mañá o borrallo
terase apagado…
¡E sobre el despacio
pasará o gado…!

¡Pasará o gado
tripando o borrallo
pra que non o pille
o mal do meigallo!

Manuel María: Os soños na gaiola (1968)

Versións:

Suso Vaamonde: O lume novo; Os soños na gaiola; 1978; Disco 1, Cara B, Corte 3