Prá mocedade

Tendes que alcender un facho
de baril inconformismo.
Non, non, diredes decote
aos profesores de mitos,
que queren de contrabando
pasar falsos paradisos.

Non, non, diredes arreo
aos que van no seu machiño
cabalgando moi contentos
entre nubes de outimismo.

Non, non, debedes decir
aos que minten por oficio.
A verdá, soio a verdá
da terra na que vivimos,
labrada en berros de lume,
nascida en berce cativo.
A verdá, soio a verdá
da terra na que nascimos.

Celso Emilio Ferreiro: Viaxe ao país dos ananos (1968)

Versións:

Bibiano: Samba pra mocidade; Benedicto e Bibiano (Voces Ceibes)*. Fonoteca 92; 1992; Cara A, Corte 2



*[Grabación orixinal realizada en directo no Pabillón de Deportes da Coruña o 25 de Xuño de 1976.]